مفهوم الايجابيه : كيف تصير شخص ايجابي ؟

تعد الايجابيه من اهم الصفات التي يجب ان يمتلكها الانسان هي اسلوب تفكير وكيفية التعامل مع الظروف والازمات والخروج بأقل الاضرار النفسية وتحويل العقبات الى فرص بدلا من التفكير بسلبيه.

لنبدأ اهم مايجب التركيز عليه

١- ركز على النعم الصغيرة :

شرب قهوتك المفضله او طعامك المفضل انظر حولك ماذا تملك 

دايما نغفل على الشي الموجود عندنا ونركز على المفقود ، احمد الله على كل شي.

٢- المحيط يفرق : 

خليك بجانب الناس المتفائله والصحيه دايما تحس محيطهم كله طاقه ايجابيه وسعيدين مايركزون على عيوب غيرهم او مايملكون ويشجعونك على التعلم والنمو ، وابعد او قلل تواصل من الناس السلبيه بدل ماتستنفذ طاقتك ووقتك كله يروح على التذمر.

٣- تعلم تقول( مايهمني ):

لاتوقف عند كل موقف وتحزن وتبالغ فيه مو كل المواقف تستاهل رده فعل فقط تجاهلها، لايعني تجاهل المشكله بل التركيز على الحلول ، وضع حدود مع الاخرين موضروري كل الناس تدخل في تفاصيل حياتك تعلم تقولهم لا لما تحس نفسك ماتبي اومتضايق من شي وتأكد لو صارلهم مثل الموقف بيرفضون بدون تردد ولاراح ينتظرون رايك.

٤- خطط لأهدافك وراقب تفكيرك :

ابدأ اكتب اهدافك اليوميه بورقه أو في ملاحظات الجوال قسم اهدافك الكبيره اولا وانجزها ليسهل بعدها الاهداف الصغيرة، لما بدأت اطبق الطريقه ساعدتني كثير على الانجاز ،هذا الشي بيخليك تركز وتقسم مهامك وتنجز اسرع، ايضا راقب افكارك السلبيه ودوّنها عشان تعرف الشي الي مضايقك وتتجنب التفكير فيه.

٥- ساعد غيرك : 

ساعد الاخرين قدم يد العون لمن يحتاج المساعده سينعكس الشي عليك بجانب ايجابي ، قدم الصدقه والطعام للمحتاجين اقلها الابتسامه في وجه اخيك صدقه.

٦- مارس الرياضه :

جميعنا نعلم ان الرياضه مفيده جدا للجانب النفسي والبدني لاتهملها خصوصا رياضه الصباح تمدك بالقوه والنشاط وتحسين المزاج، كالمشي ٢٠ دقيقه او الجري او ركوب الدراجه او تمارين المقاومه وغيرها، لاتؤجلها ابدأ الان وتمرن، الاهم الاستمراريه في التمارين .

٧- تقبل نفسك كما هي:

اعرف نقاط قوتك وضعفك، ولا تحاول تقارن نفسك بالآخرين بشكل مبالغ فيه .اعرف ان كل شخص مختلف له ظروفه وتجاربه بالحياه مو لازم تكون مثلهم ممكن تكون حياتك افضل منهم.

٨- اهميه التأمل والاسترخاء :

خمس او عشر دقائق يوميًا من التأمل أو التنفس العميق تساعد على تهدئة الذهن وتقليل التوتر ايضا الاسترخاء اجلس في مكان هادئ واغمض عينيك وتخيل نفسك في مكان هادئ او طبيعه وانت تشرب عصير مثلا، عشر دقائق من الاسترخاء مفيده جدا .

٩- استبدل العبارات السلبية بإيجابية:

بدل ما تقول "ما أقدر"، جرّب تقول "راح أحاول "، مع الوقت بيتغير أسلوب تفكيرك اعتمد هذه الطريقه بكل مشكله تواجهها ، اكتبها في ورقه وعلقها على المكتب لتراها كل يوم.

١٠- ابحث عن محتوى مفيد:

تابع بودكاست مفيد على اليوتيوب او برامج متنوعه او تابع اشخاص مؤثرين وتتأثر بالايجابيه الي عندهم، لاتضيع وقتك في مشاهير مايقدمون محتوى مفيد، اختيار المحتوى المناسب يساعد على تطوير مهاراتك ويزيد من الهامك للعمل بأشياء جديده.

١١- ركز على الحاضر وانسى الماضي :

انسى الماضي وحاول تتخطاه ماراح يرجع ولاتقدر تغير شي منه الي صار صار ، فكر ان الخطأ الي سويته ماراح ينعاد بالمستقبل وعدل منه. تذكر ان كل يوم جديد يعني فرصه جديده .

اخيرا مارس الامتنان والتقدير وحافظ على صحبتك او كون صداقات اكثر واهتم بتغذيتك اضف الفواكه والخضار الى نظامك الغذائي واشرب الماء وقلل من الاكلات الثقيله تجنب التعب والخمول  وصحتك النفسيه ونومك حافظ على ساعات نوم ٧-٩ ساعات يومياً بروتين منظم  ، طور نفسك بالقراءه قراءه الكتب يمدك بأفكار جديده وتوسع عقلك وتنميه،مارس هواياتك المفضله لعب كره القدم او التنس مع الاصدقاء، الايجابيه ضروره وليست خيار وتأكد ان المشاعر السلبيه والحزينه تؤثر على الانسان وتقلل من عزيمته ، اقتنع بالموجود وتسعد.